Сауд Арабиясында Киддия ойын-сауық аймағында орналасқан ханзада Мұхаммед бин Салман атындағы алып көпфункционалды стадионның құрылысы қарқынды жүріп жатыр. Бұл нысан 2034 жылғы футболдан әлем чемпионатын өткізуге үміткер басты ареналардың бірі ретінде қарастырылуда.
Стадион елдің тақ мұрагері Мұхаммед бин Салманның құрметіне аталған. Жоба заманауи технологиялармен жабдықталып, жылжымалы шатыр және трансформацияланатын алаңмен ерекшеленеді.
Ерекше архитектуралық шешімдердің бірі – стадионның бір қапталындағы алып жылжымалы LED-қабырға. Ол көрсетілімдер, фильмдер мен лазерлік шоуларды көрсетуге мүмкіндік береді. Қабырға ашылған кезде көрермендер трибуналар мен 200 метрлік Тувайк жартасының әсерлі көрінісін тамашалай алады.
Бұл нысан – жылжымалы шатыр, алаң және LED-қабырға біріктірілген әлемдегі алғашқы толық интеграцияланған кешен болмақ. Мұндай инновация стадионды бірнеше сағат ішінде әртүрлі іс-шараларға бейімдеуге мүмкіндік береді.
Ғимараттың сыртқы беті де толықтай цифрлық экрандармен қапталып, жартастан өсіп шыққандай әсер қалдыратын геометриялық пішінде салынып жатыр. Стадион маңында спорттық және ойын-сауық кеңістіктері бар мұнаралар бой көтереді. Олар LED-экрандармен көмкерілген ішкі көшелер арқылы байланысып, келушілерді жартас шетіндегі бақылау алаңдарына бағыттайды.
Жобаны танымал Populous архитектуралық бюросы әзірлеген. 45 мың орынға арналған стадион FIFA талаптарына толық сәйкес келеді. Болашақта бұл арена Сауд Арабиясының кәсіби лигасындағы "Аль-Хиляль" және "Аль-Наср" клубтарының үй стадионы болады.
Сонымен қатар мұнда бокс кештері, киберспорт турнирлері, концерттер мен театр қойылымдары сияқты түрлі мәдени және спорттық іс-шаралар өтеді деп жоспарланған.
Құрылыс Эр-Рияд қаласының батысында жүргізілуде. Киддия жобасы Сауд Арабиясындағы туризмді дамытуға бағытталған 14 ірі "мега-жобаның" бірі. Кешен толықтай Сауд Арабиясының Қоғамдық инвестициялар қорына тиесілі.
