Әлемнің 105-ракеткасы Михаил Кукушкин бастапқы кездесуін дүниежүзілік рейтингте 316-орында тұрған ұлыбританиялық Джек Дрэйпермен өткізді. Тартысты өткен бірінші партияда қазақстандық теннисші таразы басын өзіне аудара білді - 7:5. Бұдан кейін ұлыбританиялық спортшы 1 сағат 15 минутқа созылған бәсекені жалғастырудан бас тартты. М.Кукушкин жалпы жүлде қоры 3,64 млн АҚШ долларына бағаланған жарыстың екінші айналымында әлемнің 27-ракеткасы, ресейлік Аслан Карацевпен күш сынасады.
Ал, Зарина Дияс Miami Open WTA 1000 турнирінің үшінші айналымына шыға алмады. Дүниежүзілік рейтингте 89-орында тұрған Зарина екінші айналымда әлемнің 12-ракеткасы, швейцариялық Белинда Бенчичпен кездесті. Бірінші партияда швейцариялық спортшы айқын басымдылық көрсетті - 6:2. Ол екінші сетте де қарқынын кеміткен жоқ - 6:1. Бәсеке 1 сағат 16 минутқа созылады.
Сондай-ақ Қазақстан әйелдер құрамасының капитаны Ярослава Шведова екінші айналымда іріктеу сайысы жеңімпаздарының бірі, дүниежүзілік рейтингте 105-орында тұрған чехиялық Тереза Мартинцовамен шеберлік байқасты. Чехиялық спортшы бірінші партияда 6:4 есебімен басым түссе, екіншісінде де ойын тізгінін қолында ұстады – 6:2. Бәсеке 1 сағат 23 минутқа созылды. Нәтижесінде Ярослава Шведова чехиялық теннисшіге жол берді.
Сонымен қатар Александр Недовесов пен Андрей Голубев жұптық сында Хорватиядағы Задар челленджер турнирінің жартылай финалына шықты. Қазақстандық жұп ширек финалда босниялық Томислав Бркич - хорватиялық Нино Сердарушичпен кездесті. Бірінші партияда босниялық-хорватиялық жұп айқын басымдылық көрсетті - 6:1. Екіншісінде қазақстандықтар 6:2 есебімен есе қайырып, тай-брейкте жеңісте жетті - 12:10. Бәсеке 1 сағат 11 минутқа созылды. Александр Недовесов пен Андрей Голубев финалға шығу үшін словакиялықтар Лукаш Клейн - Алекс Молчанмен таласады.
Ермұхамед Мәулен
