"Реал" клубының шабуылшысы әрі Франция ұлттық құрамасының капитаны Килиан Мбаппе Қытайда үлкен жанжалдың ортасында қалды. Подкастта абайсызда айтқан әзілінің салдарынан футболшы бір күннің ішінде ірі демеушілік келісімшарттарынан айырылды, деп хабарлайды inbusiness.kz сайты Euronews телеарнасына сілтеме жасап.
Подкасттардың бірінде Мбаппеден өзіне қатысты сүйікті интернет-мемі туралы сұраған. Футболшы өзінің бет-бейнесі Қытай Халық Республикасының негізін қалаушы Мао Цзэдунның суретіне қойылған мемді атаған. Сондай-ақ ол Қытайдың бұрынғы басшысын "қытай диктаторы" деп сипаттаған. Бұл әзіл "диктатор Мбаппе" атты мемдер топтамасына жатады.
Қытайлық компаниялар футболшының бұл сөздеріне наразылық білдіріп, онымен ынтымақтастықты тоқтата бастаған. Олардың қатарында Dongpeng, Mengniu Dairy және Eastroc тобына кіретін Bushu La бренді бар. Ал кейбір компаниялар Мбаппе бейнеленген материалдарды өз платформаларынан алып тастаған.
Қытайдың ең ірі энергетикалық сусын өндірушісі Dongpeng және сүт өнімдерін шығаратын алып Mengniu – футболшымен ынтымақтастықты толық тоқтататынын бір мезгілде ресми түрде жариялады.
"Біздің компания ұлттық сезімдерді қорлайтын кез келген әрекетке мүлдем төзбеушілік саясатын қатаң ұстанады", – деп мәлімдеді Dongpeng өкілдері.
"Біздің компания Килиан Мбаппемен ынтымақтастықтың барлық түрін дереу тоқтатады", – деп толықтырды Mengniu өкілдері.
Жанжалға Қытай Халық Республикасының Сыртқы істер министрлігі де түсініктеме берді. Министрлік "Қытай халқының сезіміне тиетін сөздер қоғамның барлық топтары тарапынан қарсылыққа ұшырайтынын" атап өтті.
Француз футболшысы миллиондаған табыс әкелетін жарнамалық келісімшарттарынан айырылумен қатар, Азиядағы орасан зор жанкүйерлер аудиториясынан да айырылуы мүмкін. Ол бұл құрлықта өте танымал болған және "Черепашка" деген лақап атқа ие болған. Бұл атау "Ниндзя тасбақалар" мультсериалының кейіпкерлеріне байланысты қойылған.
Бұдан бөлек, Испанияның Ла Лига чемпионатының матчтарын көрсетуге де қауіп төніп тұр.
Қытайдың басты мемлекеттік телеарнасы CCTV қазіргі уақытта мадридтік "Реалдың" қатысуымен өтетін матчтардың көрсетілімінен толық бас тарту мүмкіндігін қарастырып жатыр.
Қытайлық компаниялар футболшының әрекетін ұлттық сезімге құрметсіздік деп бағалады.
