Алдағы қыркүйек айынан бастап, шамамен 8 миллионға жуық азамат жаппай декларация тапсырудан босатылады.
Бұл тізімнің ішінде зейнеткерлер, студенттер, үйбикелері, жеке кәсіпкерлер және басқасы бар, деп жазады inbusiness.kz тілшісі.
Сонымен бірге, декларация ұсынуға міндеттелгендердің қатары жаңа санаттармен толықты. Соның ішінде мүліктен, бағалы қағаздардан және басқасынан табыс табатын қазақстандықтар алдағы екі апта ішінде, 15 қыркүйекке дейін 270 нысанындағы декларацияны тапсыруға және өз бетінше салық төлеуге тиіс.
Бұл ретте егер жеке кәсіпкер пәтерін жалға беруден табыс тапса, онда 270 формасындағы декларацияны тапсыруға міндетті ме?
"Егер жеке кәсіпкер пәтерді, мүлікті өзінің кәсіпкерлік қызметінің бір бөлігі ретінде жалға берсе, мысалы, бұл оның негізгі бизнесі болса, онда ол табысын тиісті нысандағы декларацияда көрсетуге тиіс. Мәселен, салық салудың оңайлатылған жүйесінде жұмыс істесе, 910 нысанындағы декларациясында жазады. Егер кәсіпкер пәтерді жеке тұлға ретінде жалға берсе және осы салада кәсіпкерлік қызметпен айналыспаса, онда жалға беруден түскен табысы декларацияда өз бетінше салық салуға жататын кіріс ретінде көрсетуге тиіс", – деп түсіндірді Мемкірістер комитетінің жеке тұлғалардың табыстарын әкімшілендіру басқармасының бас сарапшысы Гүлден Хасенова.
Жаппай декларациялаудағы биылғы өзгерістерге сәйкес, 2025 жылы бірқатар қазақстандықтарға 250 (кіру декларациясын) немесе 270 (жыл сайынғы) нысанындағы салық декларациясын тапсыруға тура келеді.
Осы орайда тіпті бұрын 250 формасындағы декларацияны тапсырмаған адамдар да биыл 270 декларациясын толтыруға мәжбүр болуы мүмкін. Мысалы, бұл қатарға мүлкін – пәтерін, гаражын, автотұрақтағы орнын, көлігін, басқасын жалға берушілер, бағалы қағаздардан кіріс алушылар, жеке практикамен айналысатын тұлғалар және басқасы жатады.
270 декларациясында мүлікті жалға беруден, бағалы қағаздардан алынған табысты қоса алғанда, 2024 жылы алынған түрлі кірістерді тегіс көрсету қажет.
Кірістер туралы деректер сыртында, 270 нысанындағы декларацияда сондай-ақ сатып алынған мүліктер мен қарыздар туралы мәліметтер де жазылуы қажет.
Енді азаматтар жыл сайынғы декларация тапсырумен шектелмейді, сондай-ақ мысалы, биылғы 25 қыркүйекке дейін өз бетінше 2024 жылы алған табысының 10%-ы көлемінде жеке табыс салығын төлеуге де міндетті. Мұның бәрін "Салық төлеушілер кабинетінде" жасауға болады.
Мамандардың түсіндіруінше, егер сіз қазақстандық құнды қағаздарды сатып алсаңыз, немесе сатсаңыз, онда салық төлеудің қажеті жоқ. Бірақ 270 декларациясын тапсыруыңыз керек.
Nur.kz/nurfin порталының мәліметінше, егер 270 нысанындағы декларацияны бірінші рет тапсырып тұрсаңыз, тіпті былтыр 250 нысанындағы кіру декларациясын ұсынсаңыз да, бәрібір 270 декларациясын толтырған кезде "Бастапқы – Первоначальная" деген түрін таңдауыңыз қажет.
Ал, егер 270-ті екінші немесе одан көп жылда тапсырып жүрсеңіз, "Кезекті – Очередная" деген түрді таңдайсыз.
"Салық төлеуші кабинеті" (cabinet.kgd.gov.kz) сыртында, декларацияны электронды түрде бірқатар банктердің қосымшаларында, сондай-ақ eGov Mobile немесе e-Salyq Azamat қосымшаларында толтырып, тапсыруға болады.
