Польшалық ультрамарафоншы-жүзуші Бартломей Кубковски Балтық теңізін Швеция жағалауынан Польшаға дейін жүзіп өткен алғашқы адам атанды, деп жазады inbusiness.kz сайты.
Ол 160 шақырымнан астам қашықтықты еш тоқтаусыз 55 сағатта еңсеріп, адам төзгісіз сынаққа төтеп берді. Спортшы марафон барысында бір сәт те ұйықтамаған.
Сонымен қатар халықаралық ашық суда жүзу ережелерін қатаң сақтап, қауіпсіздік мақсатында қатар жүрген қайыққа бірде-бір рет сүйенбеген. Бұл талап орындалмаған жағдайда нәтиже ресми түрде есепке алынбайды.
Жарыстың ең ауыр сәті мәреге небәрі 1,5 шақырым қалғанда болды. Ұзақ уақыт бойы суда болғандықтан Кубковскийдің бойындағы күш-қуаты сарқылып, жүзуі айтарлықтай баяулаған. Соған қарамастан, командасының үздіксіз қолдауы мен жанкүйерлердің жігерлендіруінің арқасында ол соңына дейін күресіп, жағалауға аман-есен жетті.
Акция барысында онкологиялық дертпен күресіп жатқан балаларға көмек көрсететін қорға 560 мың злотыйдан астам (шамамен 160 миллион теңге) қаржы жиналды.
