Париждің "Пари Сен-Жермен" командасы клубтар арасындағы әлем чемпионатының финалына жолдама алды. Француз ұжымы жартылай финалда мадридтік "Реалды" тас-талқан етіп, 4:0 есебімен сенімді жеңіске жетті. Ойын 9 шілде күні АҚШ-тағы "Метлайф" стадионында өтті.
Кездесудің 6-минутында есепті Фабиан Руис ашты. Араға үш минут салып Усман Дембеле екінші голды соқты. 24-минутта Руис дубль авторы атанды. Ал 87-минутта Гонсалу Рамуш "Реалдың" қақпасына соңғы соққы жасады.
Финалда ПСЖ Лондонның "Челси" командасымен кездеседі. Ағылшындар 8 шілдеде өткен жартылай финалда Бразилияның "Флуминенсе" клубын 2:0 есебімен жеңді. Матчтың басты қаһарманы дубль жасаған Жоао Педро.
Биылғы клубтық әлем чемпионаты жаңа форматта өтіп жатыр. Турнирге алты құрлықтың үздік 32 командасы қатысуда. Доданың жалпы жүлде қоры – 1 миллиард доллар. Чемпионат 14 маусым мен 13 шілде аралығында АҚШ-та ұйымдастырылуда.
Финалда кім жеңіске жетеді? Жауабы 13 шілденің түнінде белгілі болады.
