Солтүстік Корея Оңтүстік Кореямен шекарасында дауыс үдеткіштер арқылы жүргізілетін пропагандалық науқанды қайта бастамақ, деп хабарлайды inbusiness.kz сайты BILD-ке сілтеме жасап.
Солтүстік Корея Оңтүстік Кореямен шекарасында үгіт-насихат тарататын дауыс үдеткіштерді қайта іске қосуды көздеп отыр. Бұл туралы Солтүстік Корея басшысы Ким Чен Ынның қарындасы Ким Ё Чжон мәлімдеді.
Оның айтуынша, бұл қадам оңтүстіккореялық әскерилердің әрекетіне берілген "қарымта жауап" болмақ. Бұл қондырғылар қазан айының соңына дейін жұмысын бастауы тиіс.
Бұған дейін екі Корея да психологиялық соғыс жүргізу үшін дауыс зорайтқыштарды пайдаланған болатын. Бұл арқылы шекараның арғы бетіндегі тұрғындарға арналған саяси хабарламалар мен басқа да материалдар таратылатын. Бұған дейін Пхеньян Оңтүстік Кореяның шекара маңындағы тұрғындарына психологиялық ықпал ету мақсатында қатты дыбыстарды қосатын еді.
Оңтүстік Корея әскерилерінің мәліметінше, соңғы екі жылда Солтүстік Корея шекара бойына 960 мыңға жуық жаяу әскерге қарсы мина орнатқан.
Сеулдің бағалауынша, демилитаризацияланған аймақта жалпы алғанда, оның ішінде Оңтүстік Корея орнатқандарын қоса есептегенде, 2 миллионға жуық мина болуы мүмкін. Сондай-ақ Пхеньян шекараны қосымша бөгеттермен және тікенек сымдармен күшейтіп жатыр, ал екі ел арасындағы бұрынғы автомобиль және теміржол өткелдері жарып жіберілген.
