Болгарияда өтіп жатқан додада 20 қазақстандықтың ішінен тек екеуі ғана жартылай финалға жолдама алды. Күн тәртібінде 10 отандасымыздың жекпе-жегі жоспарланған еді.
50 келі салмақта ел чемпионы Даниал Сәбит ширек финалда Түркия өкілі Улас Ялчинкаямен қолғап түйістірді. Екі раунд қорытындысы бойынша қазақстандық боксшы айқын басымдық танытып, 5:0 есебімен жеңіске жетті. Қарсыласы қабағындағы жарақатына байланысты жекпе-жекті жалғастыра алмады.
Ал 55 келідегі Бағлан Кенжебек моңғолиялық Билгуунсейхан Хархууга қарсы өткен кездесуде 0:5 есебімен жеңіліп, жарысты аяқтады.
Әлем чемпионатының қола жүлдегері Ертуған Зейнуллинов те ширек финалдан аса алмады. Ол Әзербайжан боксшысы Малик Хасановқа 0:5 есебімен жол берді.
70 келіге көтерілген Мұхаммедсабыр Базарбайұлы АҚШ спортшысы Лавант Броулимен болған жекпе-жекте 0:5 есебімен ұтылып қалды.
Жағымды жаңалықты Фарух Тоқтасынов жеткізді. Германиялық Рэнди Ботикалимен өткен тартысты кездесуде ол 4:1 есебімен жеңіске жетіп, жартылай финалға шықты. Айта кетейік, Фарух – осы турнирдің 2025 жылғы күміс жүлдегері.
85 келіде Сұлтанбек Айбарұлы әлем чемпионы Акмалжон Исроиловпен жұдырықтасты. Бірінші раундта белсенділік танытқанымен, жекпе-жек 0:5 есебімен қарсыласының пайдасына шешілді. Осы салмақтағы тағы бір қазақстандық Бекзат Таңатар украиналық Матвей Ряжбаға 0:5 есебімен есе жіберді.
90 келіде Дәулет Төлемісов АҚШ өкілі Джозеф Авинонгиамен кездесіп, 0:5 есебімен жеңілді. Нурмагамед Юсупов та өзбекстандық Самир Собировтан 0:5 есебімен ұтылды.
Аса ауыр салмақта (+90 келі) Нұрлан Сапарбай өзбекстандық Озодбек Әлиевке 0:5 есебімен жол берді.
Осылайша, ширек финал қорытындысы бойынша Қазақстан құрамасынан екі боксшы ғана жартылай финалға өтті. Енді олар турнирдің жүлделері үшін таласты жалғастырады.
