Қарағандыда өткен хоккей жанкүйерлерінің басты мерекесі – Қазақстан кубогының финалы нағыз шайқасқа айналды.
"Сарыарқа" мен "Торпедо" арасындағы бәсеке тек қана спорттық тартыс емес, жеңіске деген ерік пен мінездің айқын көрінісі болды.
Финалға дейінгі жол әр команда үшін оңай болмады. "Сарыарқа" топтық кезеңде қарсыластарын еш мүмкіндіксіз тізе бүктіріп, үш матчтың үшеуінде де сенімді жеңіске жетті.
Жартылай финалда "Құлагерді" 2:1 есебімен ұтып, финалға жол ашты. Ал "Торпедо" да өз тобында барлық ұпайды еншілеп, шешуші кезеңде "Арланды" 3:2 есебімен сүріндірді.
Финалдық матчта өскемендіктер алғашқы жиырма минутта "Сарыарқаның" қақпасына 3 шайба соғып, кездесудің тағдырын алдын ала шешкендей болды. Панченко, Мусоров және Александровтың шайбалары алаң иелерін абдыратып тастады.
Қарағанды командасы намысқа тырысты. Егор Кузьменко екінші үзіліске аз қалғанда 1 гол соғып, жанкүйерлерге үміт сыйлады.
Оның үстіне бұл шайба аз құрамда соғылған еді. Бірақ бұдан әрі қарай шабуылшылардың қарқыны жеткіліксіз болды. Соңғы соққыны Рахманов жасап, матчқа нүкте қойды.
Қорытынды есеп – 4:1. "Торпедо" 2025 жылғы Қазақстан кубогының иегері атанып, өзінің жеңімпаз рухын тағы бір мәрте дәлелдеді.
