Ақтөбеде заңсыз ойын бизнесін ұйымдастырған әйелге қатысты үкім шықты, деп жазады inbusiness.kz сайты.
Сот мәліметінше, айыпталушы әлеуметтік желілер арқылы онлайн-казино ұйымдастырған.
"Ақтөбе қаласының №2 сотында Қылмыстық кодекстің 307-бабы 3-бөлігі 2-тармағы ("Заңсыз ойын бизнесін ұйымдастыру") бойынша қылмыстық іс қаралды. Ойыншылардан банк шоттарына аударылған қаражаттың жалпы көлемі 52 млн теңгеден асады", – делінген сот хабарламасында.
Сот отырысында айыпталушы кінәсін ішінара мойындады. Оның кінәсі куәгерлердің айғақтарымен, банк үзінді-көшірмелерімен және іс материалдарына тіркелген өзге де фактілермен толық дәлелденген.
Сот үкімімен әйел 4 жылға бас бостандығынан айырылып, мүлкі тәркіленді. Алайда кәмелетке толмаған балаларының болуына байланысты жаза өтеу 4 жыл мерзімге кейінге шегерілді.
