Атырау облысында бір отбасының өліміне қатысты тың дерек айтылды, деп хабарлайды inbusiness.kz сайты "Ақ Жайық" газетіне сілтеме жасап.
Облыстық прокуратураның хабарлауынша, қанды қылмыс бір уақытта болмаған. Алғашқы және кейінгі қылмыс эпизодтарының арасында бірнеше ай уақыт өткені белгілі болды. Күдікті Сұлтан Сәрсемалиев өзінің балдызы Наурыз Мұқанғалиевті мамыр айында, ал қалған үш адамды қараша айында өлтірген.
Тергеу нұсқасына сәйкес, қылмысты марқұмдардың күйеубаласы жалғыз өзі жасаған. Сот-психиатриялық сараптама қорытындысы бойынша Сәрсемалиев ақыл-есі түзу деп танылды.
Айта кету керек, бұған дейін Атырауда жоғалған отбасының ісі бойынша күйеубаладан бөлек, қызы да күдікке ілінгенін жазғанбыз. Күдікті Сұлтан Сәрсемалиевке қатысты тағы бір айып тағылды.
