Осы жылы елімізде алғаш рет ауылдық округтер мен кенттер әкімдерін тікелей сайлау ұйымдастырылды. Соның нәтижесінде Павлодар облысындағы ауыл әкімдерінің 43%-ы жаңарды, деп хабарлайды inbusiness.kz тілшісі.
Облыстық аумақтық сайлау комиссиясының төрағасы Гүлнар Аманжолованың айтуынша, ауыл әкімдерін сайлауға дауыс берушілердің 79%-ы, яғни 65 мыңнан астам адам қатысты. Кейбір елді мекендерде сайлаушылар жоғары белсенділік танытып, олардың 90%-ға жуығы өз таңдауын жасады. Сондай-ақ, саяси науқан барысында кәмелеттік жасқа толған 530 жас бірінші рет дауыс берді.
Сайлау қорытындысы бойынша "Nur Otan", "Ауыл", "ADAL", "Ақжол" партияларынан ұсынылған 48 кандидат және өз-өзін ұсынған 7 үміткер әкім атанды. Олардың ең жасы – 28-де. Ең үлкені – 61 жаста.
"Ауыл әкімдерінің сайлауы барысында бір орынға орташа есеппен үш кандидат тіркелді. Бірнеше ауылда бес үміткер болды. Олардың сенімді өкілдері мен бақылаушылар тарапынан қандай да бір арыз-шағымдар түскен жоқ", - дейді Гүлнар Аманжолова.
Келесі жылы қызметтік мерзім өтілі аяқталатын үш ауылда тағы да әкімді сайлау өтеді. Сондай-ақ, өз өтініші бойынша қызметтен кеткен басшылардың орнына жаңа жетекшіні сайлау үшін дауыс беру науқаны ұйымдастырылады. Мысалы, қаңтар айында Железин ауданы Михайловка ауылдық округі әкімінің қызметтен кетуіне байланысты сайлау өтеді.
Ажар Дәулетова
