Бұл бағыттың алғашқы маңызды кезеңі 1991 жылы басталды. Сол жылы тұңғыш қазақ ғарышкері Тоқтар Әубәкіров Байқоңыр ғарыш айлағынан "Союз ТМ-13" кемесімен ғарышқа ұшты. Оның миссиясы биотехнология мен Арал өңірінің экологиясына қатысты ғылыми зерттеулерге жол ашты. Кейін Талғат Мұсабаевтың бірнеше ғарыштық экспедициясы мен ашық ғарышқа шығуы әлемдік ғарыш тарихында ерекше орын алды. Ал 2015 жылы Айдын Айымбетов халықаралық ғарыш станциясында ғылыми зерттеулер жүргізіп, қазақстандық ғарышкерлер қатарын толықтырды.
Бүгінде Қазақстан ғарыш саласын тек ғылыми бағыт ретінде емес, экономиканың маңызды секторы ретінде дамытып отыр. Астанада Орталық Азиядағы бірегей саналатын ғарыш аппараттарын құрастыру және сынау кешені жұмыс істейді. Бұл кешен халықаралық талаптарға сай сертификатталып, спутниктік өндірісті дамытуға мүмкіндік берді.
Соның нәтижесінде Қазақстан шетелдік технологияларды пайдаланушы елден өз спутниктік шешімдерін әзірлейтін мемлекетке айналып келеді. Қазақстандық Жерді қашықтан зондтау жүйелері шетелге экспортталып, Африка елдеріне жеткізілген жобалар арқылы халықаралық нарыққа шықты. Сонымен қатар түркі мемлекеттері аясында жаңа спутниктік жобалар жүзеге асырылуда.
Ғарыш саласының экономикалық тиімділігі де артып келеді. Соңғы жылдары спутниктік мониторинг қызметтері миллиардтаған теңге көлемінде экономикалық нәтиже берді. KazSat спутниктік жүйесі байланыс пен телехабар тарату саласында ішкі нарықты толық қамтамасыз етіп, импортты алмастыруға мүмкіндік берді.
Ғарыш технологиялары бүгінде күнделікті өмірге де кеңінен енген. Олар интернет байланысын жақсартудан бастап, төтенше жағдайларды бақылау және көлік қозғалысын қадағалау жүйелеріне дейін қолданылады.
Сонымен қатар Қазақстан терең ғарышты зерттеу бағытында да халықаралық жобаларға қатысып келеді. Ғарыштық қоқыстар мен нысандарды бақылауға арналған жерүсті телескоптар желісі дамытылып жатыр. Айды зерттеу және Жер маңындағы кеңістікті бақылау бағытындағы ғылыми жұмыстар да жүргізілуде.
Болашақта Байқоңыр ғарыш айлағын жаңғырту жоспарланған. "Бәйтерек" жобасы аясында жаңа зымырандарды сынақтан өткізу көзделіп отыр. Сондай-ақ ғарыш саласына қатысты туристік және ғылыми инфрақұрылымды дамыту жұмыстары да қолға алынған.
Жалпы, Қазақстанның ғарыш саласы бүгінде тарихи мұрадан заманауи технологиялық индустрияға айналып, елдің ғылыми-техникалық әлеуетін арттыруға қызмет етіп отыр.
